विलास शंभरकर यांना ‘राज्यस्तरीय आरोग्य रत्न’ पुरस्कार जाहीर विलास शंभरकर यांना ‘राज्यस्तरीय आरोग्य रत्न’ पुरस्कार जाहीर

आम्ही भारतीय, साप्ताहिक

मुंबई / प्रतिनिधी : व्यसनमुक्ती, मधुमेह नियंत्रण आणि आरोग्यविषयक जनजागृतीच्या कार्याची दखल चेंबूर येथील अयोध्यानगर, भरतकुंज सोसायटी, वाशीनाका परिसरात राहणारे विलास मुकुंद शंभरकर यांना त्यांच्या आरोग्यविषयक सामाजिक कार्याची दखल घेऊन ‘राज्यस्तरीय आरोग्य रत्न पुरस्कार’ जाहीर करण्यात आला आहे. कोल्हापूर येथील समर्थ आरोग्य फाउंडेशन, न्यूट्रीफील हेल्थ प्रो प्रा. लि. आणि शिवशंभू निवासी व्यसनमुक्ती केंद्र यांच्या माध्यमातून दरवर्षी उत्कृष्ट कार्य करणाऱ्या जनसंपर्क प्रतिनिधींचा (पीआरओ) सन्मान केला जातो. त्याच उपक्रमांतर्गत यंदा विलास शंभरकर यांची या पुरस्कारासाठी निवड करण्यात आली आहे. समर्थ आरोग्य फाउंडेशन आणि संबंधित संस्थांच्या वतीने २०१५ पासून देशभरात व्यसनमुक्ती, मधुमेह नियंत्रण, रोगप्रतिबंध, शिशुरक्षा आणि वेदनामुक्ती यांसारख्या महत्त्वाच्या आरोग्यविषयक विषयांवर जनजागृती करण्याचे कार्य सुरू असल्याचे संस्थेने म्हटले आहे. सर्वसामान्य नागरिकांपर्यंत आरोग्यविषयक माहिती पोहोचवून त्यांना निरोगी जीवनशैलीकडे प्रवृत्त करणे, हा या अभियानाचा प्रमुख उद्देश आहे.या अभियानात प्रशिक्षित जनसंपर्क प्रतिनिधी, डॉक्टर, सामाजिक कार्यकर्ते, शिक्षक, विद्यार्थी, निवृत्त कर्मचारी आणि गृहिणी सहभागी होत असल्याची माहिती संस्थेकडून देण्यात आली आहे. त्यांच्या माध्यमातून नागरिकांना आरोग्यविषयक मार्गदर्शन देणे, योग्य आहाराचे महत्त्व समजावून सांगणे, नियमित व्यायामाची आवश्यकता पटवून देणे आणि व्यसनांपासून दूर राहण्यासाठी प्रोत्साहित करणे, अशा स्वरूपाचे कार्य केले जाते.आरोग्याच्या समस्यांमुळे अनेक कुटुंबांना शारीरिक, मानसिक आणि आर्थिक अडचणींचा सामना करावा लागतो. अशा परिस्थितीत नागरिकांना योग्य वैद्यकीय सल्ला घेण्यासाठी प्रोत्साहित करणे आणि आरोग्यविषयक जागरूकता निर्माण करणे महत्त्वाचे ठरते. या दृष्टिकोनातून संस्थेच्या अभियानात सहभागी असलेले प्रतिनिधी समाजात आरोग्यविषयक संदेश पोहोचविण्याचे काम करतात. संस्थेच्या म्हणण्यानुसार, या अभियानात उत्कृष्ट कामगिरी करणाऱ्या प्रतिनिधींची दरवर्षी निवड करून त्यांना ‘राज्यस्तरीय आरोग्य रत्न पुरस्कार’ देऊन गौरविण्यात येते. यंदाही हजारो जनसंपर्क प्रतिनिधींमधून उत्कृष्ट कार्य करणाऱ्या प्रतिनिधींची निवड करण्यात आली असून, त्यामध्ये विलास मुकुंद शंभरकर यांचा समावेश आहे. शंभरकर यांना पुरस्कार जाहीर झाल्याने चेंबूर परिसरात आनंदाचे वातावरण निर्माण झाले आहे. आरोग्यविषयक जनजागृतीच्या कार्याला प्रोत्साहन देणारा हा सन्मान असून, यामुळे समाजात आरोग्याबाबत जागरूकता वाढविण्यासाठी कार्य करणाऱ्या व्यक्तींना प्रेरणा मिळेल, अशी अपेक्षा व्यक्त केली जात आहे. आरोग्यविषयक जनजागृती, सामाजिक बांधिलकी आणि नागरिकांना मार्गदर्शन करण्याच्या कार्याचा गौरव म्हणून विलास मुकुंद शंभरकर यांना जाहीर झालेल्या ‘राज्यस्तरीय आरोग्य रत्न पुरस्काराबद्दल’ त्यांचे अभिनंदन करण्यात येत आहे.